Servitù militari. Cumpostu: ‘Avanguardia o demos?’

Tags: bustianu, cramada, cumpostu, militari, servitù

ottobre 7, 2014 0

CONTRA A S’OCUPATZIONE MILITARE DE SA SARDIGNA AVANGUÀRDIA O DEMOS?
COMITADU O CRAMADA?

Datu pro iscontadu chi pro un’indipendentista sa luta contra s’ocupatzione militare de sa Sardigna est una cara de sa luta pro s’indipendèntzia, restat de atzapare sa manera prus giusta e potente pro la binchere.
Pro ne podere arresonare bisòngiat de:

1) Buscare s’àmbitu ue che ponnere sa luta contra una servitude chi non solu impedit sa soberania ma, ammalorat sa gente e su territòriu e impedit s’isvilupu econòmicu de sa Sardigna.
2) Individuare su mèdiu prus potente chi s’àmbitu ofesu podet oponnere.
3) Atzapare sa manera pro faghere movere cussu mèdiu in manera detzisa e binchidora.

Sa soberania impedida est totu intro s’àmbitu indipendentista e intro s’àmbitu natzionalista (indipendentista, soberanista e sardista autonomista) e ne benit de se chi totu sas sintesis polìticas organizadas e puru sos sìngulos fìgios de sa cultura polìtica sarda cunsìderent sa luta contra a s’ocupatzione militare una parte de sa luta de liberatzione natzionale e chi prus de àteros siant prontos a la cumbatere.
Su dannu a sa salude non b’at duda chi non lu si podet tancare intro s’àmbitu natzionalista ma interessat totu s’àmbitu natzionale, totu sa natzione. Su torio, s’uraniu impoveridu, sas nonoparticellas sunt luas democràticas, ammalorant a totu, non faghent distintzione tra indipendentistas, collaboratzionistas o italianistas, tra gente in su guvernu e gente in s’opositzione, tra gente de manca e gente de destra, ochient e boh chie lis càpitat, intro sa colletividade chi lis giogat suta.
Est craru tando chi cale siat sardu, persone chi bivet in Sardigna , si no at su dovere at de seguru su DIRITU de gherrare contra s’ocupatzione militare e de, non solu, partetzipare ma puru organizare formas e maneras de luta pro faghere agabbare su disacatu.
Est comente pro sa luta contra a su nucleare, sos tancados est ora de los aberrere non de los afortire o ne faghere noos. Sos sardos sunt de ghetare totu a pare, intro de un’ùnicu tancadu, sa Natzione Sarda e intro cussu tancadu mannu faghere sa CRAMADA, pro unire totu sos chi cumpartint paris chin nois sos puntos base de sa luta contra a s’ocupatzione militare.
Totu sos sardos depent essere postos in cunditzione de rispondere a sa CRAMADA e a pustis de faghere sa CRAMADA issos puru. Sa CRAMADA est una manera noa chi si autogenerat dae cramada in cramada, chene meres de domo e invitados, chie rispondet a sa cramada organizat e faghet sa cramada imbeniente. Sa cramada de Capo Frasca at fatu sa cramada de Santa Giusta e cussa at fatu sa de Casteddu, sa cale at a faghere s’imbeniente mantenendela in àmbitu de DEMOS e non de AVANGUARDIA.
Arricare comitados o retes batit a arricare àteros tancados chin discriminantes chi indebilint, chin organizadores e organizados, chin incrostatziones ideològicas e cunfessionales de chie organizat. Non si podet faghere una luta natzionale chirriende sa natzione, gasi si perdet. A unu sardu chi dae intro de su tancadu natzionale rispondet a sa cramada non si li podet dimandare dae cale tancadu demolidu est benende e in base a sa risposta lu atzetare o no in trintzea, isse at su diritu cantu a nois de gherrare contra a unu perìgulu natzionale.
AJÒ CHI CUSTU EST SU MOMENTU GIUSTU sos comitados sas retes rispondant a sas CRAMADAS e agiuent a faghere sas cramadas imbenientes cunservende sas particularidades issoro ma chene tentare de che collire a intro sos “bonos” e aberrere cuntierras contra a sos “malos” in base a una chirriadura “relativa” totu issoro.
AMUS RESPONSABILIDADES GENERATZIONALES E DEPIMUS DARE RISPOSTAS chi non podent essere impedidas dae tropeas de sas isferas, personales, de partidu, eletorales o cunfessionales.
SA LUTA CONTRA A S’OCUPATZIONE MILITARE EST UNA LUTA PRO LIBERARE SA NATZIONE DAE UNU DISACATU NATZIONALE E NATZIONALE DEPET ESSERE.